Dulce, ipinadi-delete ang post laban kay de Lima

KUNG naging usapan ang ginawang pagbubulgar ng singer na si Dulce laban kay Senator Leila de Lima sa kanyang social media account, ngayon naman ang pinag-uusapan nila ay ang mabilisang pag-delete niya sa post na iyon mula sa kanyang account mismo. Pero siguro nga masasabi ring too late na dahil marami na ang nakapag-save at nakapag-share ng kanyang post na iyon. Paulit-ulit din iyong inilalabas ng mga blogger.

Kung ano man ang dahilan ni Dulce at inalis niya ang kanyang post, wala na tayong pakialam. Siguro hindi naman niya inisip na lalaki ng ganoon ang issue. After all ang inilalabas mo naman sa mga post sa social media ay iniisip mong para lamang maiparating sa iyong mga friend kung ano ang iniisip mo at kung ano ang kuwento mo. Pero minsan nakakalimutan nila ang paglalagay ng restrictions, kaya ang mga post nila ay nabubungkal maging ng mga hindi nila friends. Iyan ang dahilan kung bakit kumakalat ang mga ganyang bagay.

Hindi kami naniniwalang natakot si Dulce, o may tumakot sa kanya. Palagay namin, kaya niya inalis na ay dahil na-realize niya na marami na pala ang nakialam sa kanyang posts, at hindi lamang binasa iyon kundi ipinasa-pasa na sa lahat.

Minsan may mga social media posts na ang iniisip mo, para sa inyo-inyo lang. Iyan din ang dahilan kung bakit may mga kumakalat na sex video. Kasi ang iniisip nila ok lang naman iyon dahil mga kaibigan lang nila ang makakakita. Pero hindi naisip na masisilip din iyon ng iba, maida-download at hindi magtatagal kakalat din naman iyan.

Mayroon ngang isang artists’ model na kinunan ng pictures habang siya ay nagmo-modelo para sa mga pintor. Kaso may nag-upload ng pictures na iyon. Kumalat ding bigla, ‘di napahiya pa siya.

HATAWAN – Ed de Leon