Goons na Barangay officials

ANG Magna Carta for Barangays ay panukalang batas na kasalukuyang na kabinbin sa Senado at Kamara.    

Layunin ng panukalang batas na mabigyan nang higit na insentibo ang mga barangay chairman at kagawad para mapaghusay ang kanilang trabaho at mapaunlad ang kanilang serbisyo sa lugar na kanilang nasasakupan.

Kung sakaling maisabatas ang nasabing panukala, ang barangay chairman, kagawad, maging ang  barangay secretary at treasurer ay gagawing regular employees ng pamahalaan na may regular na sahod, allowance, insurance, medical at dental coverage, retirement benefits at iba pang benepisyo na kasalukuyang tinatamasa ng isang regular na government employee.

Pero nakalulungkot isipin na sa kabila ng pagsisikap na mapaunlad ang kalagayan ng mga opisyal ng barangay, hindi iilan ang sangkot sa iba’t ibang ilegal na gawain. Marami sa kanila ang dawit sa droga, ilegal na sugal, protector ng prostitusyon, gun running, carnapping at iba pang uri ng krimen.

Marami sa mga opisyal ng barangay ang walang ginagawa sa kanilang nasasakupan, at sa halip ay naghihintay na lamang ng biyaya mula sa pamahalaan at mga politiko.

Sa Metro Manila, talamak ang ganitong mga kalakaran.  Sa Maynila, napakaraming barangay ang malala ang problema ng peace and order dahil sa kabi-kabilang kaso ng drugs, robbery, theft at ilegal na sugal.

Sa ngayon, walang ipinagkaiba ang marami sa ating mga barangay official sa mga traditional politician na ang sariling interes ang inuuna kaysa kapakanan ng bayan.