Janno at Donny hilahod ang mga pelikula

HATAWAN
ni Ed de Leon

MASAMANG balita, naghihilahod sa takilya ang pelikula ni Janno Gibbs at ni Donny Pangilinan. Iyan na nga ba ang sinasabi namin eh, basta ang pelikula ay hindi nai-promote mabuti at umasa lamang sa publisidad on line, maghihilahod talaga.

Tingnan ninyo ang mga pelikula noong Metro Manila Film Festival (MMFF), palibhasa hindi umasa on line at ang mga artista ay kumilos nang husto, lahat maliban sa isa ay kumita. Eh pagkatapos niyon ang ginawa ng mga kasunod ay umasa na naman sa on line, iyan ang napala nila.

Tama ang isang obserbasyong narinig namin. Iyong mga nagbabasa kasi on line, iyan din ang nanonood lang sa internet streaming. Iyan ang nakababad sa Youtube, at iba pang platforms, hindi iyan ang nanonood ng sine. Iyong mga nagbabayad para manood ng sine, hindi iyan nagpapa-download ng e-copy ng mga pelikula, hindi nanonood sa maliit na screen ng computer at cellphone. Handa iyang magbayad para manood sa sinehan na may big screen. Iyan din iyong mga tao na ang gusto ay magkaroon ng diversion, iyong mabago man lang ang kapaligiran. Hindi iyan ang nakaupo lang sa bahay at nagkakalikot ng internet. Kaya hindi napapansin ng mga ganyang tao ang promo sa internet lang.

Isa pa, ang mga nanonood ng sine ay humahanap ng mga box office stars. Ang nasa isip nila kaya iyan hindi box office star ay dahil hindi magaling, o hindi magaganda ang ginagawang pelikula, kaya paano mo sila maaasahang magbayad ng mahal sa sinehan? Hinahanap nila ang mga artistang gusto nila.

Kung baguhan ka pa lang na walang napatutunayan, aba eh huwag kang magbida agad. Kung ikaw naman iyong matagal nang nagpahinga at magbabalik pa lang, huwag ding magbida agad. Tantiyahin mo muna. Hindi sapat iyong mayroon kang isang ghrupo ng mga tumitiling fans para maging hit ang pelikula mo. Iyang mga nagtitiliang iyan ay hindi sapat para mapuno ang isang sinehan lang, ang lalabas abono ka pa dahil sa minimum guarantee na kailangang bayaran sa sinehan kung hindi mo maabot ang quota.

Isa pa, katatapos nga lang ng festival at natural sawa pa ang mga tao sa sine, kung indie rin lang ang ipalalabas ninyo, sana naghintay na lang kayo ng panahon.

Isa pa iyan, kung ang pelikula ninyo ay low budget, alam nila indie lang iyan, bakit ka nga naman manonood eh ang mahal ng admission price ng sinehan tapos ang pelikula ay maliit lang naman ang puhunan at tinipid pa?

Iyan ang hindi iniisip ng mga producer na basta gawa na lang ng gawa ng pelikula. Iyang paggawa ng pelikula pinag-aaralan iyan, ano ba ang kuwentong gusto ng mga tao, sino bang artista ang gusto nilang mapanood? Sino bang direktor ang makagagagwa ng isang mahusay na pelikula?

Kung hindi pa ninyo napag-aaralan iyan, huwag muna kayong mag-produce ng pelikula, malaki ang kaibahan ng pelikula kaysa pagtitinda ng tinapa at tuyo sa talipapa.