Joey ‘di pa nababayaran, Eat Bulaga apektado na sa gulo sa TAPE 

HATAWAN
ni Ed de Leon

HINDI lang daw P30-M, may paramdam na mas malaki pa ang naging utang ng TAPE Inc. kay Vic Sotto sa hindi nababayarang talent fees noon. Pero mabuti naman at sinabi ni Vic mismo na nabayaran na siya at sinabing, ”mabuting na-media.” Kay Joey de Leon daw ay umabot din sa P30-M ang utang. Hindi naman masabi ni Vic kung nabayaran na rin ng buo si Joey.

Nang tanungin kung paano nila natagalan ang ganoong sitwasyon, sinabi ni  Vic na, “sanay sa ganyan ang TVJ, may panahon ngang hindi talaga kami sumuweldo ng isang taon eh.Tapos bale wala na iyon, ang mahalaga ay enjoy ka sa trabaho mo.”

Ganyan ang mga usapan simula nang magkaroon ng gulo nang sabihin ng pamilya Jalosjos na ite-take-over na nila hindi lamang ang TAPE kundi maging ang actual na production ng Eat Bulaga. 

Nag-retire na nga ang dating producer niyon  na si Tony Tuviera. May nagsasabi naman na gusto na raw talagang mag-retire  ni Tuviera noon pa man, pero ngayon lumalabas na hindi pala ganoon. Palagay namin hindi matatapos ang controversy na iyan hanggang hindi sila magkakasamang humaharap sa publiko. Magkakaiba kasi ang lumalabas na statements eh. 

Ewan kung totoo ang mga tsismis, kinausap na rin daw ng mga Jalosjos ang retired executive ng show na si Malou Choa-Fagar para siyang tumayong executive producer ng show kapalit ng nag-retire na si Tony. Ito namang mga host nila, parang mas pabor kay Tuviera.

Palagay namin para mas maging maayos kung may gusto man silang gawing transistion, huwag nilang madaliin, panatiliin muna nilang gaya ng dati ang lahat, naapektuhan na ng controversy ang kanilang commercial load.

Hindi maganda para sa show iyong ganyang nagkakagulo sila.