James nganga pa rin ang career 

HATAWAN
ni Ed de Leon

NAGKALAT na naman sa social media ang mga picture na nagpapakitang hinahalikan ni James Reid si Kelsey Merritt. Si Kelsey Merritt ay siyang unang Fill-Am na naging model ng Victoria’s Secret.

Pero puro ganoon naman si James. Puro siya publicity sa social media  na may ka-date na celebrities, o kaya sinasabi may mga gagawing collaboration kasama ang mga foreign artist pero hanggang ngayon naman ay wala.

Malaki ang epekto kay James noong magdesisyon siyang magsolo, mag-produce ng sarili niya na hindi naman niya naihanda. Ibinebenta niya noon ang kanyang bahay para nga siguro ang mapagbebentahan niyon ay magiging puhunan niya, pero hindi naman yata naibenta. Mukhang nagkamali sila ng diskarte nang gawin niyang manager ang tatay niya. Nagkamali rin sila sa paniniwalang sapat na ang popularidad ni James noon para tumakbo nang ok ang kanyang career.

Sa ngayon, kumikilos naman pero nganga pa rin si James. Sinasabi nila na nabibili naman ang kanyang mga kanta pero walang naging malaking hit at dahil doon wala namang kumukuha sa kanya sa mga concert, na  talagang kumikita ang mga artist.

Ewan kung ano pa ang susunod na magagawa ni James. Ngayon tagilid din siya kahit na sa tv, dahil identified siya sa ABS-CBN na ngayon naman ay walang prangkisa. Saan nga ba siya tatakbo?