HATAW! D'yaryo ng Bayan hatawtabloid.com
HATAWAN
ni Ed de Leon
ILANG araw lamang matapos na kumalat ang balita at inamin ni Eula Valdez na hiwalay na nga sila ng dating boyfriend na si Rocky Salumbides, na naka-live in din niya ng ilang panahon. Lumabas naman agad ang kuwento na ang ka-live in na niyon ngayon ay ang aktres na si Pia Pilapil, na hiwalay na rin naman sa dating asawang si Gerry Gonzalo.
Lumalabas na kung ano man ang dahilan ng kanilang paghihiwalay, matagal na iyong pinag-iisipan ng kanyang partner kaya may nakasama na iyong iba agad. Marami ang nagsasabing masakit iyan para kay Eula, pero naniniwala kaming kaya niya iyan.
Hindi naman iyan first time na nangyari sa kanya. Kung iisipin matagal din ang naging relasyon nila ni Ronnie Quizon, na siyang una pa niyang partner. Nagkahiwalay sila makalipas ang ilang taon din. Pero may natagpuan din namang iba si Eula, si Richard Litonjua na pinakasalan pa siya. Nagpakasal sila sa paniwalang forever na iyon, pero hindi rin nangyari. Nagkahiwalay sila at nakita naman niya ang kanyang last partner. Siguro nga masasabing dahil sa kanyang mga naging karanasan, kayang dalhin ni Eula ang nangayaring iyan sa kanya.
Iyan si Eula, kahit naman noong araw na bata pa iyan, fighter iyan. Hindi madedehado sa laban iyan. Ang isa pa ngang masasabi, sabihin mang hindi siya suwerte sa kanyang love life, napakaganda naman ng takbo ng kanyang career. Kahit na sabihin mong supporting roles lamang ang karaniwan niyang ginagawa, hindi naman siya natitigil. Nakatutulong iyon. Dahil busy siya hindi niya masyadong nararamdaman ang emotional stress.
Basta kami, ang paniwala namin makakaya iyan ni Eula, at sigurado rin naman kami na darating din ang isang araw na may darating na makakasundo niya at makakasama na niya hanggang sa pagtanda niya.
