Jasmine tinitiris ng AlDub

HATAWAN
ni Ed de Leon

SINASABI na nga ba namin noon pa eh, magiging nega ang dating nina Alden Richards at Jasmine Curtis Smith. Hindi natin maikakaila na hanggang ngayon pinaninindigan ng AlDub Nation iyong kanilang stand, kaya kahit na umamin nang magsyota sina Maine Mendoza at Arjo Atayde, hindi nila tinatanggap at nega rin sa kanila. Kaya mapapasin naman eh, malaki ang ibinaba ng popularidad ni Maine, at si Arjo hindi halos maka-angat ang popularidad.

Si Alden ganoon din ang nangyayari. Oras na si Alden itinambal mo sa iba, nega ang magiging dating niyon. Kaya lang sila sumuporta kay Kathryn Bernardo dahil una, malakas ang fan-backing ng KathNiel, pangalawa alam nila na hindi naman magpapaligaw si Kathryn kay Alden dahil syota na iyon ni Daniel Padilla.

Ngayon tingnan ninyo, picture pa lang ang lumalabas, binabanatan na ng fans, eh ‘di lalo na kung magsisimula na ang kanilang serye. Eh iyan namang Jasmine wala pang fan backing eh, ano nga ba ang maaasahan mo? Titirisin lang iyan ng AlDub.

Iyong sitcom nga ni Maine. Ipina-boycott ng AlDub noong i-guest si Arjo, naapektuhan eh kahit na sabihin mong naroroon pa si Vic Sotto, eh iyan pa ba?