Joshua, bigong makausap si Gerald

SA totoo lang, hindi naman dapat na maging kontrobersiyal kung nag-split man sina Gerald Anderson at Bea Alonzo. Wala rin namang usapan dapat kung naghiwalay man ng landas sina Joshua Garcia at Julia Barretto. Nagkaroon lang ng gulo noong mag-deny sina Gerald at Julia, pero sinabi naman ni Dennis Padilla na totoong nanliligaw si Gerald sa anak niya.

Nadagdagan ang gulo nang ang magkapatid na Gretchen at Claudine Barretto ay nakisimpatiya kay Bea na kaibigan naman kasi nila. Pero dahil doon nagkagulo ang pamilya, at nangyari pa ang eskandalo sa burol ng kanilang ama, at sa harap pa ni Presidente Digong. Iyon ang nagpalala eh.

Tapos ano, ang sinisisi ng nanay ni Julia ay ang press, na siya raw nagpalaki ng gulo. Pero may masasabi ba naman kung walang nangyayari?

Ngayon nagsisimula na namang umugong ang mga kuwento, dahil sa sinabi ni Joshua na gusto niyang makausap si Gerald para sabihing wala namang problema sa kanilang dalawa. Hindi siya sinagot ni Gerald, pero para sa kanya ok na iyon.

Ang mahalaga kasi kay Joshua, masabi niyang wala siyang sama ng loob kanino man. Napakaliit nga naman ng industriya at tiyak na magkakasalubong din sila isang araw, at ayaw niya iyong may samaan pa sila ng loob.

HATAWAN
ni Ed de Leon