Sharon, sumabog sa galit

“WORLD war 3 na ba?” bungad sa amin sa chat ng isa naming kaibigan. Hindi kami aware kung bakit, at saka niya sinabi na sumabog sa galit ni Sharon Cuneta laban sa isang director na movie writer din, at sa isang tila political blogger na nagsabing kung siya ay 12 years old lang, gagahasain niya ang anak ni Sharon at walang ibang masisisi kundi ang tatay niyon na gumawa ng juvenile law.

Iyong isa ay blind item lang naman, pero siguro tama si Tita Maricris na nagsabi sa aming ”identifiable naman kasi.” May limang tao lang na magsabi ng ganoon, tapos na ang usapan. Noong araw walang pumapansin diyan sa cyber libel, pero nang masintensiyahan si Maria Ressa, marami na ang naniwala sa batas na iyan.

Iyong isa naman ay figure of speech. Kasi ang sabi niya, ”kung ako ay 12 years old,” eh hindi naman dahil matanda na siya. Hindi masasabing may tangka siyang gahasain ang anak ni Sharon. Ang sinasabi niya, kung siya ay 12 years old at gawin niya iyon, hindi siya mapaparusahan dahil minor siya, at ang masisisi ay ang asawa ni Sharon na gumawa ng juvenile law.

Pero iba ang analysis namin dahil hindi kami galit. Siguro dahil hindi kami ang concerned. Kung sumiklab man ang galit ni Sharon, kasi siya at ang pamilya niya ang concerned sa mga iyon.

Naniniwala rin si Sharon na idinamay lang ang pamilya niya, lalo na ang kanyang mga anak dahil sa personal na galit sa kanya ng gumawa niyon. Hindi naman niya sinabi ang pinagkagalitan nila. Alam man namin kung saan nagsimula iyon, wala kaming pakialam sa mga bagay na iyan, lalo’t hindi naman kami concerned sa awayan nila. Hintayin na lang natin ang paghaharap nila sa tamang forum.

HATAWAN
ni Ed de Leon