John Lloyd at Bea movie, sure hit

NAGKASAMA lang sa isang script reading project sina John Lloyd Cruz at Bea Alonzo, marami na agad ang nagsabi na bagay silang dalawa, at hindi lang sinasabing sana ay magkaroon sila ng pelikula. May nagsasabi pang sana magkatuluyan na lang silang dalawa.

Sina John Lloyd at Bea ay nakagawa na rin naman ng ilang pelikulang lahat ay naging malalaking hits. May tuksuhan pa ngang pareho sila ng kapalaran, dahil basta na lang hiniwalayan ng nanay ng kanyang anak na si Ellen Adarna si John Lloyd. Si Bea naman ay sinasabing ipinagpalit ng dati niyang boyfriend sa iba. Pero sinasabi ngang panalo pa rin sila dahil parang mas lalo silang sumikat matapos na mangyari naman ang ganoon sa kanilang lovelife.

Siguro nga kung mabibigyan ang dalawa ng isang magandang love story, kikita nang malaki iyan. Sabik na sabik ang mga tao na muling mapanood sa isang magandang pelikula si John Lloyd, at siyempre ang gusto nila ay iyong mga pelikulang gaya niyong dati niyang ginagawa. Hindi kasi panahon para mag-experimental movie si John Lloyd sa ngayon.

Si Bea naman, patuloy na maganda ang resulta ng kanyang mga pelikula, at kung makakasama nga ang dating ka-love team na si John Lloyd, aba eh patok iyan.

Aba eh sa ngayon kailangang isipin muna nila ang mga pelikulang kikita nang malaki. Baka iyan pa ang kanilang maging fall back position. After all hindi nila kailangan ng congressional franchise para makagawa ng mga pelikula. Baka iyon ang maaari nilang maasahang magtutuloy-tuloy sa panahong ito.

Kami man naniniwala na magandang isang proyekto ang ipagawa kina John Lloyd at Bea, baka sa tagal nang hindi nila pagtatambal makagawa sila ng panibagong box office hit record.

HATAWAN
ni Ed de Leon