Bea, may mensahe sa mga naninira: Bahala na ang Diyos sa kanila

TAMA na naman ang ginawa ni Bea Alonzo. Kasunod ng kabi-kabilang statements na sinisiraan siya ng iba’t ibang grupo, sinabi niya sa kanyang social media post na, ”bahala na ang Diyos sa kanila.” Iyan naman ang tamang attitude talaga. May magagawa ka nga ba roon sa mga naninira sa iyo kung hindi ipagpasa-Diyos mo na lang, after all ang Diyos naman ang nakaaalam ng lahat ng katotohanan.

Sinasabi nga nilang sa kanyang attitude, hindi siya maaaring magkamali.

Sa simula’t simula naman may mga basher ding naninira kay Bea, pero ang ginawa nga niya hindi niya pinansin ang mga iyon, at sinasabi niyang ipinagdarasal na lang niya ang mga taong naninira sa kanya. Hindi niya sinagot ang sinasabi ng kanyang mga kalaban. Naniwala nga kasi siya na ang pinakamahusay na panlaban ay huwag mong pansinin kung ano man ang sinasabi nila.

Sa halip, sinasabi nga niyang gagawin niya kung ano sa palagay niya ang mas makapagpapabuti pa sa kanyang propesyon bilang isang artista. Nag-aaral siya ngayon ng pagsusulat ng script, hindi naman dahil sa isang ambisyong maging script writer kundi sa paniniwala niyang kung ganoon nga ay mas maiintindihan niya at mas maa-appreciate ang mga script na inihaharap sa kanya para sa mga gagawin niyang pelikula.

Kaysa nga naman sa ubusin niya ang kanyang oras sa kababasa ng kung ano-anong talak na makapagpapasama lang ng loob niya. In the first place, ano nga ba ang sinabi niyang masama laban sa kanino man? Ni wala naman siyang sinabi.

Inamin lang niya na hindi sila nag-split ni Gerald Anderson kundi basta na lang siya hindi kinausap noon, na inamin din naman ni Gerald dahil away nga raw sila ng away. Eh ano ang masama roon?

HATAWAN
ni Ed de Leon