HATAW! D'yaryo ng Bayan hatawtabloid.com
MUKHA ngang mabango ang actor na si Isko Moreno bilang bagong mayor ng Maynila matapos niyang linisin ang Divisoria at ang Carriedo sa Quiapo. Hindi lamang sa wala nang madaanan at nagkalat ang basura, talamak din ang mga mandurukot sa mga lugar na iyan. Ngayon nahuli na rin kung sino ang nagpapa-upa ng puwesto sa mga iyan na hindi naman alam ng City Hall.
Pero mabigat ang binitiwang salita ni Mayor Isko, sabi kasi niya “basta nakabalik ang mga vendor sa Divisoria, ibig sabihin niyon nalagyan ako.” Kasi ang alok daw sa kanya P5-M araw-araw na lagay payagan lang niya ang mga vendor sa Divisoria. Iyon kayang paradahan sa tapat ng National Press Club na mayroon pang mga carinderia, magkano naman ang lagay? Tuwing pupunta kami sa opisina ng Hataw iyon ang napupuna namin eh, at doon na naghuhugas, sabay tapon sa kanal.
Kung iisipin mo naman, hindi lang si Mayor Isko. Maraming mga artistang maganda rin ang record bilang mga politiko. Maganda ang record ni Mayor Richard Gomez sa Ormoc. Nakagugulat dahil maski na ang religious community suportado si Ate Vi (Cong. Vilma Santos) sa Lipa.
Sana magpatuloy sila sa ganyan. Sana wala nang artistang masangkot sa mga kaso ng corruption at plunder, kasi nakasisira iyon sa image ng mga artista. Iyang artista kasi, kailangang mapanatili nila ang isang malinis na image. Kaya nga sila hinahangaan ng fans dahil doon eh. Kung lalabas na mandurugas sila, sino nga ba ang hahanga pa sa kanila.
Kaya sana ang lahat ng mga artistang nakapuwesto sa ngayon, magaya riyan kina Mayor Isko, Mayor Goma, at Ate Vi, na maganda ang ipinakikitang record ng paglilingkod. Nakita naman ninyo hindi natatalo. Pero basta sa tingin ng tao mandurugas, asahan ninyo kahit minsan hindi mananalo iyan.
HATAWAN
ni Ed de Leon
