Alex, may nakatatawang pakiusap sa Dos — ‘wag munang kunin sa Darna

MULING tinanggihan ni Angel Locsin na gumawa ng pelikulang Darna. Bukod sa kanyang problema sa spinal column, sinabi na rin naman ni Angel na sa palagay niya tapos na para sa kanya ang gumanap ng mga super hero roles. Huwag na ninyo siyang kulitin.

May mga nangungulit nga kasi kay Angel, dahil sa TV gumagawa na siya ng action. Baka naman sakaling magagawa na niya iyong Darna. Eh kaso ayaw na nga niya.

Pero talagang tawang-tawa kami roon sa post niyong si Alex Gonzaga, na makikiusap siya sa ABS-CBN na huwag muna siyang kukuning Darna. As if kukunin siya. Sa lahat ng joke na narinig namin kay Alex, diyan lang kami natawa nang husto.

Si Lea Salonga naman, kahit na noong araw, hindi iyan nag-ambisyon na maging Darna, pero ang sinasabi niya palagay niya mas maganda kung ang role ay maibibigay sa isang baguhan. Sinabi rin niya na sana mukhang Pinay naman ang makuha, hindi iyong mga Tisay na mukhang Kano. Tutal, madadala naman ng popularidad ng character at ng kuwento kung sino man ang baguhang kukunin nila para sa role. Ang punto ni Lea, huwag na iyang mga dating beauty title holder na nag-aambisyon pa. Huwag na rin iyong mga gustong makakawala sa isang love team ang kunin nila. Humanap na ng bagong talent, may na-build up pa.

Pero kagaya nga ng nasabi na namin, kung kami lang ang tatanungin walang ibang makagagawa ng Darna sa ngayon, walang babagay maliban nga kina Angel at Liza Soberano, pero pareho na ngang hindi puwede.

Baka naman kunin na lang nila si Ate Gay, na nag-post pa sa social media na naka-costume na siya ng Darna at tumatakbo sa kalye.

HATAWAN
ni Ed de Leon