Maine, gustong iburo ng fans

NOONG unang nabalita na kaibigan ni Maine Mendoza si Sef Cadayona at nagpunta siya sa bahay niyon at nagkatuwaang magkantahan, aba katakot-takot na paninira agad ang inabot ni Sef. Galit na galit sila kay Sef kasi nanliligaw daw kay Maine.

Maski si Maine sinisiraan nila, hindi na raw nahiya at siya pa ang nagpunta sa bahay nina Sef.

Ang sumunod, galit na galit na naman sila kay Juancho Trivinio, kasi nakita nila kasama ni Maine na nanood ng isang concert, at may suspetsa na silang nanliligaw iyon kay Maine.

Ngayon ang pinuputakti na naman nila ay si Arjo Atayde, kasi sinasabing nanliligaw iyon kay Maine. Lalo pang nagpuyos ang galit nila nang maging guest si Arjo roon sa show ni Vice Ganda at diretsahang tinanong kung, “jowa mo ba si Maine?” Sumagot ng “no” si Arjo, at ang nangyari nakoryente siya sa “lie detector machine.”

Galit na galit na naman ang mga taong ang gusto yata ay ilagay sa isang garapon si Maine, lagyan ng asin at gawing buro. Ewan namin kung nagpapa-boost pa sila ng kanilang posts na naglalaman ng galit, pero siyempre pinapatulan naman sila ng mga pra la la nila.

Sabihin nga ninyo, ano ba talaga ang gusto ninyong mangyari kay Maine? Gusto ninyo siyang iburo?

Masarap ang burong dalag, lalo na nga iyong burong hipon na kung tawagin sa Pampanga ay balo-balo, lalo’t may sariwang dahon ng mustasa at sasabayan mo ng malutong na pritong hito. Pero si Maine, gagawin ninyong buro? Huwag naman. Ang ganda-ganda niyong bata buburuhin ninyo?

HATAWAN
ni Ed de Leon