Sharon, iniiwasan na naman ni Gabby; paggawa ng movie, imposible na

NGAYON, sinasabi nilang mukhang si Gabby Concepcion na naman ang umiiwas sa kanilang muling pagtatambal ni Sharon Cuneta. Hindi lang sinasabing dahil nakipag-negotiate na siyang muli sa kanyang network tungkol sa mga susunod niyang gagawing proyekto, which means kung matutuloy iyon ay halos imposible na naman siyang makagawa ng pelikula, at dahil sa kanyang naging reaksiyon sa mga sinabi ni Sharon sa isang interview sa kanya sa telebisyon.

Nag-sorry naman si Sharon at sinabi niyang wala siyang masamang intensiyon. Wala naman siyang sinabing masama kahit kanino, nabigyan lang ng ibang pakahulugan ang sinabi niya. Minsan kasi, napaka-transparent nga ni Sharon, at hindi niya naiisip kung ano ang mga bagay na maaaring sabihin sa mga usapang personal, kaysa roon sa maaari mong sabihin sa publiko talaga.

Hindi naman sa kani-kanino, pero mukhang hindi nga yata magandang pakinggan iyong sinasabi niyang magkakabalikan na sana sila noon, pero may nakita na namang iba si Gabby. Inaamin naman ni Gabby na may mga pagkakamali rin siya, pero napakahirap nga naman na iyong mga lumang sugat na naghilom na sana ay muling sinugatan, at kiniskis pa ng asin.

Ngayon nga na wala pa silang ginagawa kundi isang commercial na ni wala pang isang minuto, ganyan na ang mga usapan, ano pa kaya ang magiging takbo ng mga kuwento kung may gagawin silang pelikula? Sa ganyang sitwasyon, sabi nga namin hindi naman kani-kanino, pero normal lang na umiwas si Gabby. After all, alam naman nating lahat na ang buhay ng isang artista ay ang maganda niyang image. Kung iyong mga pagkakamali na nagagawa sa buhay ay paulit-ulit ngang uungkatin, hindi rin naman maganda. Isipin naman ninyo, 13 taon na ngang namalagi si Gabby sa abroad para makalimutan ang lahat ng kontrobersiya at makapagsimula ng panibagong buhay, tapos ngayon pa lang siya bumabawi ganyan na naman ang mga kuwento, eh ano nga ba ang mangyayari?

Tama rin naman si Gabby, na siguro nga kung may gagawin sila, dapat sa isang producer at director na neutral lamang sa kanilang dalawa.

HATAWAN!
ni Ed de Leon