Kuwento at ‘di artista ang nagdadala ng pelikula — Alessandra

ISANG baguhan na naman, si Ivan Padilla, ang leading man ni  Alessandra de Rossi sa kanyang pelikulang 12. Diyan sa pelikulang iyan, nag-level up pa si Alessandra, dahil hindi lamang siya artista kundi sinasabing sa kanya pa ang kuwento at siya rin ang sumulat ng script ng pelikula.
“Kasi naniniwala ako wala sa artista iyan eh, nasa kuwento talaga. Kahit na sino ang artista, basta maganda ang kuwento ng pelikula panonoorin iyan ng mga tao. Magiging hit iyan. Kagaya nga niyong pelikula namin ni Empoy, wala namang nagsabing naging hit iyon dahil kami ang artista. In fact wala ngang nag-isip na iyon ay magiging malaking hit. Pero naging hit iyon dahil sa kuwento.
“Matagal ko nang sinasabi iyan eh. In fact mas nauna pa nga itong project na ito na ako ang gumawa ng script. Mas nauna ito eh, kaya lang at that time nag-iisip pa sila kung sino ang kukuning artista. Noong maging hit iyong pelikula namin ni Empoy, mukhang nakumbinsi ko sila sa sinasabi ko na wala sa artista iyan. Kahit na sino basta marunong umarte ok lang, kasi ang tao naman nanonood ng pelikula dahil sa kuwento,” sabi ni Alessandra.
Palagay namin tama siya, kasi kahit naman noong araw, ang kuwento ang mahalaga. Ang ugali nga ng mga Pinoy, lahat sila nakapanood na ng sine, pero pagkatapos niyon nagkukuwentuhan pa sila tungkol sa istorya ng pelikula. Karaniwan nang basta hindi nila nagustuhan ang pelikula, ang sinasabi nila “pangit ang istorya”. Wala namang nagsasabing pangit ang artista eh.
Pero iyon nga, nang magpasukan ang mga “magagaling na director” puro technicality at opticals ang ginagamit, wala nang kuwento. Mayroon pa hindi marunong magkuwento, apat na oras na ang pelikula malabo pa rin ang kuwento. Iyan ang mga pelikulang hindi pinanonood ng mga tao.
Tama si Alessandra, kuwento ang nagdadala sa pelikula.