HATAW! D'yaryo ng Bayan hatawtabloid.com
ANG tsismis, nagmamadali raw umalis si Andi Eigenmann sa isang affair at halatang umiiwas na makausap ng press. May dahilan naman siya. Siguro hindi pa siya handa na magsalita tungkol sa pagkakabulgar sa publiko ng katotohanan na ang ama ng kanyang anak ay si Jake Ejercito. Bagamat marami naman ang nakaaalam niyan, narinig namin iyan mula mismo kay Andi, kaya nga lang walang public admission, at may panahon na ang talagang tinutukoy niyang ama ng kanyang anak ay si Albie Casino.
Ngayon si Andi ang nalalagay sa alanganin. Lumalabas na binola niya ang publiko sa pagsasabi noong si Albie ang tatay ng anak niya. Lumalabas na unfair siya sa kanyang ginawa kay Albie. Hindi naman kasi maikakaila na dahil sa controversy na iyon ay nasira ang career ni Albie. Malakas sana ang dating niya noon bilang leading man ni Kathryn Bernardo sa Mara Clara, pero nawalan siya ng assignment dahil sa controversy na nilikha ng pagbubuntis ni Andi.
Pero palagay naman namin, sobra na iyong sinasabi ng iba riyan na kung hindi nangyari iyon kay Albie ay hindi sana nakaarangkada ng ganyan si Daniel Padilla. Ang paniwala naman namin, si Daniel, sino man ang makapartner sisikat din talaga iyang batang iyan. Magaling naman siyang umarte at masasabi nating napakalaking advantage ng mukha ni Daniel. Kung sabihin nga nila, ”parang Aga Muhlach noong araw”.
Hindi mo masasabi kung ano ang mangyayari, pero siguro parang mali naman iyong sabihing kung hindi nila ginanoon si Albie ay siya sana ang nasa puwesto ni Daniel Padilla ngayon. Sobra namang presumption iyon. Maaaring mas sumikat nga si Albie dahil talagang nabara ang kanyang career dahil sa controversy, pero hindi naman masasabing siya sana ang sikat at hindi si Daniel.
Tungkol naman kay Andi, talagang marami siyang kailangang ipaliwanag.
HATAWAN – Ed de Leon
