Sandro, tatapusin muna ang masters’ degree bago mag-artista o mag-politiko

MARAMI ang nagsasabing dapat nga raw, mag-artista na si Sandro Marcos, ang poging anak ni Senador Bongbong Marcos. Kung sa bagay lahat naman ng mga anak niya pogi at puwedeng maging artista, pero ang mga taga-showbiz medyo mainit kay Sandro at talagang kinukumbinsi siyang pumasok sa pelikula.

Hindi naman malayo iyon, kasi si Senador Bongbong ay naging artista rin noong araw. Siya ang gumanap na Bongbong din doon sa pelikulang Pinagbuklod ng Langit ng Sampaguita Pictures. Iyon ay pelikula sa buhay ng kanyang mga magulang.

Nagbibiro nga si Senador Bongbong, na dahil wala naman daw siyang masyadong pagkaka-abalahan ngayon, baka siya na ang maging manager ni Sandro.

Panay naman ang iling ni Sandro dahil sinasabi niyang gusto muna niyang matapos ang kanyang masters’ degree bago ang kahit na anong papasukan niya, showbiz man o politika.

Pero iyong members ng entertainment press na naroroon, walang tigil sa pagsasabi kay Sandro na mag-showbiz na muna siya, after all napatunayan naman na it is the easiest way para makapasok ka rin sa politika later on.

Hoy, pero mas malaki ang kita ng artista kaysa isang politiko.

HATAWAN – Ed de Leon