Rave party, sinugod ng JaDine fans

HINDI raw nagtagal iyong concert-rave party noong isang gabi sa MOA. Ang nagkuwento naman sa amin ay iyong mga pulis mula sa Pasay City. Marami raw taong nanood. Kasi bukod doon sa mga international artists, kasama rin doon sina James Reid at Nadine Lustre. Eh iyon lang JaDine, simpleng meet and greet lang dahil doon sa libro nilang Team Real, sinugod ng mahigit na 10,000 tao, eh iyan pa bang may performance sila.

Pero ang kuwento nga niyong mga kaibigan naming pulis, noong umikot daw sila ng mga 1:00 a.m., pauwi na iyong mga ibang pulis na na-deploy doon. Akala nga raw nila tatagal ng hanggang madaling araw kagaya niyong concert na may limang namatay.

Hindi rin naman daw ganoon ka-wild ang mga nanood. May nagsasayawan din pero hindi masyado. Kasi nga walang nakapasok na droga. Iyong mga nagwawala naman sa mga concert, iyan ang mga nakatira talaga ng party drugs, lalo na nga ng ecstasy. Kung manonood lang naman, hindi naman ganoon talaga ang behaviour eh.

Mabuti naman at hindi na naulit ang naunang trahedya. Aba eh matakot na sila. Hindi sila talaga bibiruin ng droga. Hindi rin naman bibiruin ang mga pusher ng droga ngayon. Iyang mga pusher na iyan, hindi na puwedeng magpa-bebe. Mememete na sila.

HATAWAN – Ed de Leon