HATAW! D'yaryo ng Bayan hatawtabloid.com
HATAWAN
ni Ed de Leon
TIYAK na masaya ang naging Pasko ng mga Vilmanian, dahil si Ate Vi (Ms Vilma Santos) na mismo ang nagsabing magkakaroon siya ng isang pelikulang
katambal si Boyet de Leon sa unang quarter ng 2023. Ibig sabihin, pagkatapos ng bagong taon, at ang makakasama pa niya ay isang katambal na gusto ng fans. Isa pa, bagama’t mukhang mauurong na naman ang tv project na inaasahan dahil sa ilang problema, may mapapanood namang isang special na sadyang ginawa para sa kanyang 60th sa Pebrero.
Marami rin pumasok na mga bagong endorsements si Ate Vi, na kailangan niyang gawin sa first quarter. Mukhang babawian naman siya ngayon matapos ang matagal ding pahinga. Talagang humingi naman siya ng leave noong nakaraang taon pa. Isipin naman ninyo, ngayon lamang siya nakapagpahinga matapos ang 23 taon ng public service, Mas matindi iyon kaysa trabaho sa showbiz. Tapos alam naman natin na noong ready to work na siya, noon naman siya natamaan ng Covid kaya nagkaroon na naman ng delay ang lahat.
Ang nakatutuwa magca-comeback si Ate Vi sa isang totoong pelikula, hindi iyon indie. Iyon ang klase ng pelikulang hinahanap ng mga tao. Malaki ang casting, hindi binarat ang production at ginawa nang mahusay. Iyon naman ang isang bagay na sinisiguro ni Ate Vi, iyong ang gagawin niyang mga pelikula ay may katuturan. Minsan lang
siya gumawa ng indie, pero ginawa iyon bilang pakikisimpatya sa maliliit na artista sa pelikula. Hindi siya kumuha ng bayad sa
pelikulang iyon at sa halip nakiusap siyang iyong ibabayad sa kanya ay hati-hatiin para sa mga extra sa pelikulang iyon.
Ngayon balik siya sa pelikulang pang-sinehan talaga. Siya kasi ang inaasahan ngayon na tatapos sa slump ng industriya.
