Lugmok na industriya ng sapatos sa Marikina, inisnab ng gobyerno

PARA sa mga magsasapatos sa lungsod ng Marikina, inisnab ng gobyerno ang kanilang hiling na tulungan silang maiahon ang lugmok na industriya ng sapatos na apektado ng pandemya.

Ayon kay Engr. Mojica, isa sa mga lider at pinakamatandang magsasapatos sa lungsod, naniniwala siya na kayang gawin ni presidential aspirant at kasalukuyang allkalde ng Maynila Francisco “Isko Moreno” Domagoso na maibalik ang sigla ng industrya na iginupo ng mga murang imported na produkto ngayong pandemya.

Nakababanaag aniya sila na makaaahon sa lugmok na sitwasyon ang mga magsasapatos sakaling manalo sa halalan ang sinusportahan nilang kasalukuyang alkalde ng Maynila.

Una nang nagpahayag ng kanilang pagsuporta kay Moreno ang mga magsasapatos dahil alam nila umanong nauunawaan sila at ramdam ng alkalde ang kanilang kalalagayan.

Sa pagdalaw ng mga kandidato ng Aksyon Demokratiko sa pangunguna ni Dr. Willie Ong, senatorial candidates na sina Atty. Jopet Sison, Samira Gutoc, at Karl Balita, ipinahayag nila ang hangaring muling ibalik ang pagkilala nito sa buong bansa.

Kasama ng mga magsasapatos ng Marikina ang iba’t ibang volunteer group kabilang ang President Isko Movement, Oksi at Isko Volunteers Movement.

Samantala, matatandaan, unang nanawagan ang grupo ng magsasapatos sa Marikina sa pamahalaan na bilhin ang kanilang mga yaring sapatos at ipamahagi sa mga mag-aaral ngunit wala umano silang nakuhang tugon mula rito. (EDWIN MORENO)