HATAW! D'yaryo ng Bayan hatawtabloid.com
Isumbong mo
kay DRAGON LADY
ni Amor Virata
NAKATATAWA si VP Sara Duterte, nahawa na sa pagkaluka-luka ni Senator Imee Marcos. Gusto umano ni VP Sara na tuldukan ang political dynasty sa bansa. ‘Di ba nakaloloka? E alam naman ng lahat na ang Davao City ay pinaghaharian ng Duterte clan dynasty?!
Parang sinabi ni VP Sara na gibain ang political dynasty sa mga siyudad sa kalakhang Maynila gaya ng lungsod ng Pasay at Parañaque. Sa nakalipas na halalan, nagwagi ang magkapatid na Edwin at Eric Olivarez, sa Pasay City ay ang magkapatid na Emi Calixto-Rubiano at Antonino Calixto. Nasundan pa ng pagkapanalo ni Vice Mayor Mark Calixto at District 2 Councilor Luigi Calixto. Apat na apelyidong Calixto sa Pasay, sa Parañaque ay tatlong Olivarez na.
Sa opinyon ng inyong lingkod, walang masama kung magkakapatid, mag-ama o magkamag-anak ang nanalo sa halalan dahil magkakaisa sila sa magandang programa at mga proyekto na ang makikinabang ay ang kanilang mga constituents.
Mga botante ang nagluklok sa kanila, ibinoto sila kaya tigilan na ni VP Sara ang kadadakdak ng mga walang kuwenta dahil naghahanap lamang siya ng maraming kaaway.
Sakaling maudlot ang impeachment laban sa kanya at tumakbo siyang Pangulo ng bansa sa 2028, huwag na siyang umasa na iboboto siya ng mga kasapi ng political dynasty.
