HATAW! D'yaryo ng Bayan hatawtabloid.com
TAGUIG CITY — Opisyal nang binuksan nitong Huwebes Hunyo 25, ang Asia Pacific Padel Cup Manila 2026, sa Play Padel McKinley West Park, Chateau Rd. sa BGC Taguig City, hudyat ng pagsisimula ng apat na araw na kompetisyon na lalahukan ng mga koponan mula sa iba’t ibang bansa sa rehiyong Asia-Pacific.
Sa ikatlong edisyon nito, patuloy na ipinapakita ng torneo ang mabilis na paglago ng padel sa rehiyon, habang pinagsasama-sama ang mga nangungunang manlalaro mula sa mga kalahok na bansa bilang pagdiriwang ng isport, pagkakaibigan at kooperasyong panrehiyon.
“Ang APPC 2026 ay mahalagang yugto sa patuloy na paglago ng padel sa rehiyong Asia-Pacific,” ani ni Jeff Cheng, pangulo ng Padel Pilipinas.
“Bilang nagtatanggol na kampeon, papasok kami sa torneo na may malaking pagmamalaki at pananagutan — hindi lamang para makipagkumpetensya kundi para ipakita sa rehiyon kung ano ang kayang maabot ng atletang Pilipino kapag nabibigyan ng tamang suporta at oportunidad.”
“Ikinararangal ng Philippine Olympic Committee na suportahan ang Padel Pilipinas sa pagho-host ng prestihiyosong kompetisyong ito sa rehiyon,”
pahayag ni Abraham “Bambol” Tolentino, pangulo ng Philippine Olympic Committee.
“Ang mga kaganapang tulad ng Asia Pacific Padel Cup ay patunay kung gaano kalayo na ang narating ng padel sa rehiyon — at ang Pilipinas, bilang nagtatanggol na kampeon, ay patunay ng maaaring makamit kapag ang isang pederasyon ay itinayo sa matibay na pundasyon. Inaasahan naming masaksihan ang pinakamahusay na koponan ng Asia-Pacific dito mismo sa Maynila.”
“Mabilis nang nagiging sentro ang Pilipinas ng mga umuusbong na isport sa rehiyon, at ang pagho-host ng Asia Pacific Padel Cup 2026 ay malinaw na patunay ng pag-usad na ito bilang bahagi ng kampanya ng PSC para sa sports tourism,”
ayon kay Patrick “Pato” Gregorio, chairman ng Philippine Sports Commission.
“Hindi lamang ipinapakita ng torneo ang mabilis na paglago ng padel sa bansa, kundi pati ang dedikasyon ng ating mga atleta na patuloy na nagpapataas ng antas ng kompetisyon. Ikinararangal naming suportahan ang pandaigdigang kaganapang ito habang ipinapakita ang world-class na laro, pinatitibay ang ugnayan sa rehiyon, at ipinagdiriwang ang husay at talento ng mga atleta sa buong Asia-Pacific. Hangad naming mahikayat ang mga kabataang atletang Pilipino na masaksihan ang world-class na padel dito mismo sa ating bansa upang ma-inspire silang abutin ang kahusayan sa pandaigdigang entablado.”
“Ang pagho-host ng Asia Pacific Padel Cup sa unang pagkakataon sa Maynila ay isang layuning matagal naming pinagtrabahuhan,”
ani ni Atty. Duane Santos, secretary general ng Padel Pilipinas.
“Higit pa sa isang kompetisyon ang torneyong ito — isa itong pahayag na handa na ang Pilipinas na manguna sa pagpapaunlad ng padel sa rehiyon. Malugod naming tinatanggap ang bawat koponan, atleta at tagahanga na naglakbay patungo rito, at nakatuon kaming maghatid ng karanasang karapat-dapat sa kampeonatong ito.”
Nagtipon-tipon ang mga atleta, coach, opisyal, partner at mga miyembro ng komunidad ng padel para sa pagbubukas ng torneo na tatakbo mula Hunyo 25 hanggang 28. Sa kabuuan ng kompetisyon, maglalaban ang mga koponan para sa titulo ng APPC habang ipinapakita ang husay, sigasig at sportsmanship na naging tatak na ng torneo.
Papasok ang Pilipinas sa edisyong ito bilang nagtatanggol na kampeon matapos ang tagumpay nito noong 2025, habang naghahanda namang hamunin ng mga koponan mula sa iba’t ibang bansa ang titulo sa inaasahang pinakamahigpit na labanan sa kasaysayan ng torneo.
Mula nang itatag ito, nagsilbi ang Asia Pacific Padel Cup bilang plataporma para mapalakas ang koneksyon ng mga komunidad ng padel sa rehiyon at makatulong sa patuloy na pag-unlad at pagpapalawak ng popularidad ng isport.
Agad nagsimula ang kompetisyon matapos ang opening ceremonies, at magpapatuloy ang mga laban sa buong linggo bago magtapos sa championship finals sa Linggo, Hunyo 28, 2026.
Inaanyayahan ang mga tagahanga at tagasuporta na masaksihan ang mataas na antas ng padel habang nagtatagisan sa Play Padel McKinley West Park ang mga koponan mula sa buong rehiyong Asia-Pacific para sa Asia Pacific Padel Cup 2026 title.
