HATAW! D'yaryo ng Bayan hatawtabloid.com
ni TEDDY BRUL
NAGPAHAYAG ng pangamba ang mga environmental volunteer hinggil sa sinabing malawakang paghawan ng kagubatan sa Mt. Ping-as, isang mahalagang ekolohikal na lugar at kilalang pilgrimage site sa bayan ng Pakil, Laguna.
Sa isang panayam, sinabi ni Danilo Francisco, pinuno ng boluntaryong Commission on Ecology ng Diocese of San Pablo, may 20 volunteers ang umakyat sa bundok noong 20 Hunyo 2026 upang magsiyasat sa natanggap nilang ulat na may malakihang land clearing operation sa nasabing kabundukan.
Ayon sa grupo, tumambad sa kanila ang malawak na bahagi ng tinapyas na mga halaman, nakatumbang puno, at mga putol-putol na kawayan. Naabutan din umano nila ang mga manggagawa na nagtitipon ng mga tuyong sanga at dahon para sa open burning.
Ang mga dokumentadong video sa site ay isinumite sa pahayagang ito bilang ebidensiya. Paliwanag ng mga tauhan sa site, bahagi ang clearing ng preparasyon para sa itatayong 1,400-megawatt Ahunan Pumped-Storage Hydropower Project.
Ayon sa kinatawan ng proyekto, ang mga binuksang bahagi ay paglalagyan ng malalaking tubo ng tubig sa ibabaw ng lupa na mag-uugnay sa lower reservoir sa Laguna de Bay patungo sa upper reservoir sa bundok. Idinagdag pa ng kinatawan na mas ligtas ang bagong disenyo ng mga nakalantad na tubo kaysa ibaon ang mga ito sa ilalim ng lupa.
Ang mga naturang advocate ay kasapi ng MANAPAK, isang malawak na koalisyon na tumututol sa Ahunan Dam sa Pakil. Binubuo ang samahan ng mga residente, mga kura paroko, religious groups ng kababaihan at kabataan, at mga katutubong mamamayan sa bulubundukin ng Sierra Madre.
Nangangamba ang koalisyon na ang patuloy na paghawan sa Sierra Madre ay magdudulot ng matinding pagguho ng lupa (soil erosion), flash floods, at pagkasira ng mga likas na bukal ng tubig na pinagkukuhaan ng mga karatig-komunidad kapag naging ganap na ang operasyon ng planta.
