19-anyos speedcuber Wong, tuloy ang pag-ukit ng pangalan sa mundo ng cubing
PATULOY na umaangat sa mundo ng speedcubing ang 19-anyos na Ateneo de Manila University student na si Brenton Angelo Lo Wong matapos muling patunayan ang kanyang husay sa Philippine National Cubing Open na ginanap nitong Mayo sa Tagaytay City, Cavite.
Hinarap ni Wong ang ilan sa pinakamahuhusay na speedcubers sa bansa at matagumpay na nasungkit ang kampeonato sa 3x3x3 Cube event sa isa sa pinakamalalaking speedcubing competitions sa Pilipinas na inorganisa ng National League of Mind Sports in the Philippines sa pangunguna ni Philippine Olympic Committee (POC) president Abraham “Bambol” Tolentino.
Bago ito, naitala rin ni Wong ang back-to-back na kampeonato sa Philippine Cubing Championship at ang pambansang rekord sa 3x3x3 Cube matapos itong malutas sa loob lamang ng 3.84 segundo.
“Yung competition sa Tagaytay, parang bagong experience kasi malaki ang cash prizes at maganda ang kondisyon. Sana moving forward ay mas dumami pa ang cash prizes, exposure at oportunidad para sa buong cubing community,” ani Wong sa lingguhang Tabloid Organization in Philippine Sports (TOPS) Usapang Sports Forum. sa Philippine Sports Commission (PSC) conference hall sa Rizal Memorial Sports Complex sa Malate, Maynila.
“Para sa akin, ang motivation ko ay ipagpatuloy lang ang paglalaro,” dagdag pa niya.
Ayon kay Wong, mahalaga ang tamang paghahanda sa bawat torneo, lalo na ang mental conditioning at tuloy-tuloy na ensayo upang mapanatili ang mataas na antas ng kanyang performance.
“More on mental ang preparations ko. Nagdarasal muna ako, ina-acclimatize ang sarili lalo na kapag malamig ang venue at tuloy lang sa practice. Napakaraming algorithms sa cubing, lalo na sa advanced level, kaya taon ng pagsasanay ang kailangan para maging consistent,” paliwanag niya sa forum na sinuportahan ng Philippine Sports Commission, Pocari Sweat at Behrouz Persian Cuisine.
Hindi rin nakalimutang pasalamatan ni Wong ang kanyang pamilya, mga kaibigan, sponsors at higit sa lahat ang Diyos sa patuloy na suporta sa kanyang karera.
“I am so grateful sa lahat ng sumusuporta sa akin, lalo na kay God, sa pamilya, mga kaibigan at sponsors gaya ng MnM Cube Shop. Sport ito na talagang nangangailangan ng suporta,” ani Wong.
Bukod sa pagiging atleta, aktibo rin siyang nagtuturo sa mga baguhang speedcubers sa pamamagitan ng online at onsite workshops upang mas maraming kabataan ang mahikayat sa naturang sport.
“Inirerekomenda ko talaga ang speedcubing dahil masaya ito at hindi nakakasawa. Sana mas dumami pa ang competitions at awareness. Maganda rin ito dahil nababawasan ang oras ng mga bata sa gadgets. Marami ring magulang ang nagsasabing malaking tulong ito sa kanilang mga anak. Hinihikayat ko ang lahat, bata man o matanda, na subukan ang speedcubing,” saad niya.
Sa ngayon ay nakatutok si Wong sa nalalapit na Philippine Cubing Championship sa Iloilo sa susunod na linggo bago ang pagsabak sa isang international competition sa Singapore sa Disyembre. (HNT)
