Tsinaptsap na katawan ng lalaki natagpuan sa Montalban

NATAGPUAN ang putol-putol na bahagi ng katawan gaya ng ulo, torso, braso, at paa ng isang lalaking pinaniniwalaang biktima ng summary execution at itinapon sa Zigzag Road, Brgy. San Jose, sa bayan ng Rodriguez (Montalban), lalawigan ng Rizal, nitong Huwebes ng madaling araw, 17 Marso.

Ayon sa ulat, nakita ang tsinaptsap na bangkay ng ilang pasahero na nakalagay sa itim na garbage bag sa Zigzag Road, kapaon ng madaling araw.

Nang buksan ng mga pulis ang garbage bag, tumambad ang pugot na ulo, at iba pang bahagi ng katawan ng isang lalaki na puno ng tattoo.

Ayon kay P/Lt. Col. Marcelino Pipo, Jr., hepe ng Montalban PNP, maaaring itinapon sa lugar ang bangkay ng biktima upang iligaw ang imbestigasyon ng pulisya.

Paniwala ng opisyal, matindi ang galit ng mga suspek dahil sa ginawang pagkatay sa bangkay.

Patuloy ang imbestigasyon ng pulisya upang matukoy ang pagkakilanlan ng biktima.

Sinusuri rin ng mga awtoridad kung mayroong CCTV camera sa lugar na makatutulong sa imbestigasyon. (EDWIN MORENO)