Pastor itinumba habang nagmimisa (Sa Surigao del Norte)

BUTUAN CITY – Masusing iniimbestigahan  ng pulisya sa bayan ng San Francisco, Surigao del Norte ang pagpatay sa preacher ng Lord Jesus Christ fellowship habang nagmimisa sa loob ng simbahan kamakalawa ng hapon sa Brgy. Jubgan sa nasabing bayan.

Hindi na nadepensahan pa ng biktimang si Allan Ursabia, 45-anyos, may asawa at residente ng Bagong Silang, Brgy. Washington, Surigao City, ang kanyang sarili nang lapitan ng dalawang hindi nakilalang suspek at siya ay binaril sa harap mismo ng kanyang mga parishioner.

Ayon kay Senior Insp. Marcelino Gavina Jr., hepe ng pulisya sa nasabing bayan, patuloy pa nilang inaalam ang motibo ng krimen at ang pagkakakilanlan ng mga suspek na mabilis na tumakas.

Sa inisyal na imbestigasyon ng pulisya sa mga kaanak ng biktima, wala silang natatandaang mayroong nakaalitan o kaya’y naagrabyadong tao ang pastor.