P7-B sinisingil ng Ayala Group ‘di pa babayaran — Purisima

NILINAW ng gobyerno na hindi pa nakatakdang bayaran ang P7 bilyon sinisingil ng Ayala Group.

Ito’y bilang danyos sang-ayon sa pinasok na kontrata sa LRTA at nakapaloob sa sovereign guarantee.

Sinabi ni Finance Sec. Cesar Purisima, nasa unang bahagi pa lamang ng pag-uusap ang panig ng DoTC at Ayala Group.

Ayon kay Purisima, wala pa siyang masasabing kategorikal sa ngayon dahil nagkakaroon pa ng negosasyon.

Ngunit kinompirma ni Purisima na naniningil ang Ayala Group ng P7 bilyon dahil sa pagkakalugi sa operasyon ng LRT Line 1 at iginigiit ang sovereign guarantee na pinagkasunduan.

Una rito, napaulat ang sulat ni DoTC Sec. Joseph Emilio Abaya kay Budget Sec. Butch Abad para maglabas ng ganoong halagang pambayad sa mga Ayala bagay na inulan ng batikos.