Bus nahulog sa bangin 2 patay, 19 sugatan (Sa Zambo City)

ZAMBOANGA CITY- Dalawa ang patay habang 19 ang sugatan nang mahulog sa bangin ang isang pampasaherong bus ng Rural Transit Mindanao Incorporated (RTMI) sa national highway ng Brgy. Pasobolong sa Zamboanga City kahapon.

Ayon sa report, nanggaling sa Pagadian City ang naturang bus at pasado 5 a.m. kahapon nang pagdating sa kurbadang bahagi ng kalsada ay dumiretso ito sa gilid.

Unang bumangga ang bus sa isang motorsiklo na minamaneho ng isang Amelia Buco, 50, residente ng naturang lugar, agad binawian ng buhay sa insidente.

Tuluyang nahulog sa bangin ang bus at bumangga sa isang bahay.

Sunod na binawian ng buhay ang isa sa 19 sugatang pasahero ng bus na kinilalang si Raquel Solis ng Lanao Del Sur.

Kasamang ginagamot sa ospital ang driver ng bus na si Rogelio Bambao, 50, ng Labangan sa Zamboanga Del Sur.

Inaalam pa ng pulisya kung posibleng nakaidlip ang driver ng bus kaya humantong sa insidente.