Bad spirits sa pinutol na puno sumanib sa 11 teens

CAGAYAN DE ORO CITY – Naalarma ang Department of Education (DepEd) Schools Division ng Misamis Oriental hinggil sa ilang mag-aaral ng sekondarya na sinasabing sinanipian masamang espiritu.

Ayon sa ulat, sinapian ang 11 mag-aaral na pawang babae, ng bad spirits makaraan putulin ang mag-aapat dekada nang malaking punongkahoy ng Talisay sa loob ng Baliwagan National High School ng Balingasag sa Cagayan de Oro.

Inihayag ni DepEd Schools Division Supt. Dr. Cherry Mae Limbaco, nakaranas ng panghihina ng katawan ang mga biktima hanggang sa mawalan ng malay dahil sa pagputol ng kahoy.

Sinabi ni Limbaco, pinutol ang puno dahil may itatayong karagdagang school building ngunit hindi nila inaasahan ang pangyayari.

Aniya, maging siya ay naguguluhan at hirap magpaliwanag ukol sa nangyari sa mga bata kaya minabuting ipinayo na sumangguni sa siyensiya at mga taong-simbahan.

Sa ngayon, ipinag-utos ni Limbaco sa school principal ng paaralan na pagpahingahin muna ang mga apektadong mga estudyante at pabalikin na lamang kung tuluyan na silang makabalik sa normal na sitwasyon.

Napag-alaman na unang iginiit ng ilang guro na nakaramdam lamang ng nerbyos ang mga mag-aaral mula Grade 7 at 8 kaya hinimatay makaraan maputol ang malaking punongkahoy nitong nakaraang araw.