60-anyos Chinese, 5 pa tiklo sa droga

ARESTADO ang isang 60-anyos Chinese national na No.5 most wanted person, at limang iba pa sa pinaigting na kampanya laban sa droga sa lalawigan ng Rizal.

Kinilala ni Senior Supt. Bernabe Balba, PNP Provincial Director, ang mga nadakip na sina Kai Wai Lee, 60, alyas Kawali, Chinese national, nakatira sa Sta. Ana, Maynila; Harry Baltazar, 25; Lea Alcantara 37; Maricel Bulalayao, 34; Bong Kenneth Orduña, 27, at Jameson Dalimpapas, 23-anyos.

Unang nadakip si Lee na wanted sa paglabag sa R.A 9165 o Comprehensive Dangerous Drugs Act of 2002 dakong 9 a.m. Habang dakong 5 p.m. nang madakip ang lima pang suspek na nagsasagawa ng pot session sa Taytay, Rizal.

Nakompiska mula sa mga suspek ang apat plastic sachet ng shabu, aluminum foil, tooter, dalawang lighter, dalawang plastic ng marijuana, limang bala ng cal. 45, bala ng super .38 caliber at bala ng 9mm pistol.

Nahaharap ang mga suspek sa kasong paglabag sa R.A. 10591 (Illegal Posession of Firearms at Ammunition) at paglabag sa R.A. 9165 (Comprehensive Dangerous Drugs Act of 2002).