NPC solons solid kay Mar
Hataw
August 12, 2015
News
MAHIGIT isang dosenang mambabatas ng Nationalist People’s Coalition ang nakipagpulong sa pambato ng administrasyong Aquino at outgoing DILG Secretary Mar Roxas kahapon sa Quezon City.
Sinabi ni NPC Secretary General at Batangas Rep. mark Llandro “Dong” Mendoza na may basbas ng liderato ng NPC ang kanilang pagdalo sa pakikipagpulong kay Roxas.
Nilinaw niyang imbitasyon sa mga tagasuporta ang pagpupulong at wala pang pormal na napagkakasunduan ang buong partido.
“NPC usually votes as a bloc but talks are still open for deciding. At the end of the day, majority rules. Personal decisions are important,” ani Mendoza.
Ang pagpupulong na ito ay bahagi ng mga paunang pag-uusap sa pagitan ng mga miyembro ng NPC na supporters ni Roxas.
Kasama sa naturang pulong sina representatives Mark Enverga, Darlene Antonino, Evelio “Bing” Leonardia, Henry Teves, Jorge Arnaiz, Scott Lanete, Susan Yap, Jun Achason, Aries Aumentado, Mercedes Alvarez at Isidro Rodriguez, Jr.
Kinompirma ni Davao del Sur Governor Claude Bautista sa isang interview ng media kahapon na sina NPC founder at Chairman emeritus Eduardo “Danding” Cojuangco at negosyanteng si Ramon Ang ang naghikayat sa party members na makipagpulong kay Roxas at pakinggan ang plano ng huli.
Sa pangyayaring ito, tila napabulaanan sa nasabing pagpupulong ang mga naunang pahayag ni NPC member Giorgidi Aggabao na buo na ang desisyon ng partido para sa sinasabing tandem nina Senadora Grace Poe at Senador Francis Escudero.
Hanggang ngayon ay wala pa rin malinaw na anunsiyo sila Poe at Escudero sa kanilang plano para sa darating na halalan.