HATAW! D'yaryo ng Bayan hatawtabloid.com
ISANG 24-anyos beautician ang nadakip nang mang-umit ng tsokolate sa isang drug store nitong Sabado ng umaga, 28 Agosto, sa lungsod ng San Juan.
Kinilala ng pulisya ang suspek na si August Leo Quiambao, 24 anyos, isang beautician.
Nabatid na dakong 8:00 am kamakalawa, nang pumasok si Quiambao sa drug store sa Brgy. Rivera, sa lungsod, at nagpanggap na namimili.
Ayon sa security officer na si Ferdinand Talamisan, kinuha ng suspek ang dalawang piraso ng tsokolateng Toblerone na nagkakahalaga ng P232 at inilagay sa dala niyang bag saka mabilis na lumabas nang hindi nagbabayad.
Dito na hinarang ni Talamisan ang suspek at hiningan ng resibo ngunit walang maipakita sa guwardiya.
Kasalukuyang nakapiit ang suspek at nakatakdang sampahan ng kasong qualified theft.
(EDWIN MORENO)
