HATAW! D'yaryo ng Bayan hatawtabloid.com
SUGATAN ang hepe ng security force habang 50 iba pa ang ginamit na hostage ng isang guwardiya na tinanggal sa trabaho sa loob ng isang mall sa Greenhills, sa lungsod ng San Juan, kahapon, 2 Marso.
Kinilala ni P/Capt. Georel Calipusan ng San Juan PNP ang nabaril na hepe ng mga security guard na si Ronald Velita, at ang suspek na si SG Archie Paray, na habang isinusulat ang balitang ito’y hawak ang 50 hostage sa loob ng Virra Mall, sa naturang lungsod.
Sa inisyal na ulat ng pulisya, dakong 11:22 am nang mag-amok ang suspek dahil sa hindi umano pantay na pagtrato ng naturang mall.
Samantala, inilagay sa lockdown ng pulisya ang Greenhills area at inabisohan ang publiko na umiwas muna sa lugar para sa kanilang kaligtasan.
Umapela si San Juan City Mayor Francis Zamora sa suspek na sumuko at palayain ang mga hostage victim.
Nabatid na tinanggal sa kaniyang trabaho si Paray at humihiling na makausap ang kaniyang dating mga katrabaho sa pamamagitan ng video call.
“AWOL (absent without leave) siya. Ilang linggo na rin hindi pumapasok. So, mukhang mayroong issue siguro ito patungkol sa kanyang trabaho bilang guwardiya but tinitinginan pa natin,” sabi ng alkalde.
Dagdag ni Zamora, niyayaya ni Paray ang kaniyang mga dating katrabaho na sumama sa kaniya ngunit wala ni isa sa kanila ang nagpaunlak.
“Masama ang kanyang loob sapagkat siya’y tinanggal bilang guwardiya at nagdesisyon siyang magpunta rito sa shopping center,” ani Zamora.
(EDWIN MORENO)
