Magdalo: Poe-Trillanes kami

PINABULAANAN ng Magdalo Party-list na sinusuportahan nila ang kandidatura ni Vice Presidential candidate  Chiz Escudero, matapos lumabas ang balita na tatlumpong party-list groups ang nagkaisa upang iendoso ang nangungunang presidential candidate na si Sen. Grace Poe at ang kanyang bise presidente na si Sen. Chiz Escudero. 

Ayon kay Magdalo Representative Gary Alejano, “Gustong linawin ng aming grupo na si Grace Poe ang aming sinusuportahan sa pagka-presidente at si Antonio Trillanes IV naman sa pagka-bise presidente.

“Taliwas sa mga lumabas na balita, hindi namin ini-endoro si Sen. Escudero dahil tumatakbo rin  ang aming Magdalo national chairman na si Antonio Trillanes IV bilang bise presidente.”

Naniniwala kami na ang tambalang Poe-Trillanes ay pinakamainam na kombinasyon na magtutulak ng aming mga adbokasiya sa peace and order, anti-corruption, at poverty alleviation,” paliwanag ni Alejano. (HNT)