Sanggol, 5 pa patay sa fuel tanker

TACLOBAN CITY – Patay ang anim katao, kabilang ang isang anim-buwan gulang na sanggol, makaraang araruhin ng isang fuel tanker ang ilang kabahayan sa Brgy. Lale, Pinabacdao, Samar, kahapon ng umaga.

Kinilala ang mga biktimang sina Michael Buenavides, 20; Maryjoy Buenavides, 18, kasama ang anim buwan gulang niyang sanggol, gayondin si Angela Buenavides Balundo, pawang mga residente sa nasabing lugar.

Binawian din ng buhay ang hindi pa nakilalang driver ng truck at ang kanyang kasama.

Batay sa report ng Samar Provincial Police Office, biglang nawalan ng preno ang truck na nagresulta sa pagkakahulog nito sa kaliwang bahagi ng daan at nabangga ang tatlong kabahayan.

Nagliyab ang nasabing fuel tanker kasama ang naturang mga bahay.

Bukod sa mga namatay, marami rin mga nasugatan sa insidente.