HATAW! D'yaryo ng Bayan hatawtabloid.com
NOONG bago magkatapusan ng buwan ng Pebrero ng taong kasalukuyan, may isang insidente na naganap na hindi nakarating sa kaalaman ng hepe ng pulisya ng Parañaque City at maging kay Brgy. Captain Chucky Cortez ng Sun Valley District II ng nasabing lungsod.
Sa pagitan ng alas dose at alas dos ng umaga sa Villa Paraiso, limang kabataan, tatlong babae at dalawang lalaki ang nakaistambay sa tapat ng isang coffee shop nang biglang dumating ang apat katao na pawang nakasibilyan at may mga nakasukbit na baril sa kanilang beywang.
Ang apat na lalaki ay pawang mga tauhan ng Police Precint No. 7 ng Parañaque Police Station.
Ang limang kabataan ay biglang nagtakbuhan na pawang nasa edad 14-16 anyos dahil takot sa mga pulis na dumating, na ayon sa mga testigo ay pawang mga amoy alak.
Sa pagtakbo ng limang kabataan, isa sa kanila, kinilalang si David Bungallon, 15 anyos ng Gawad Kalinga, Villa Paraiso, Brgy. Sun Valley.
Ilang metro rin ang habulan na naganap hanggang mahuli si David ng pulis na may apelyidong Valera.
Ayon sa mga saksi, pinalo umano ng baril sa mukha ni Valera ang biktimang si David na naging dahilan upang malunok nito ang isang bagang na ngipin.
Kitang-kita ng mga testigo na bitbit ng pulis na si Valera ang biktima at duguan ang mukha. Habang nagpupumiglas ang biktima at sumisigaw ng, “Sir, bakit po ano ang kasalanan ko?”
Sa puntong iyon, isa sa kasamahang pulis na may apelyidong For ang kumuha ng gamot at bulak, saka ginamot ang sugat ng biktima.
Galit na galit umano ang mga magulang ng biktima nang makita ang kalagayan ng anak at kanilang isinugod ito sa pinakamalapit na ospital saka nagreklamo sa Presinto 7.
Kinabukasan, nagtungo umano ang pulis na si Valera sa bahay ng biktima kasama ang isang kasamahang pulis at pilit na inaareglo ang mga magulang ng biktima na menor de edad.
Sa una ay naging matigas ang mga magulang ng biktima, nagtungo at nagsumbong pa sila sa programa ni Raffy Tulfo para humingi ng tulong.
Nang malaman ito ni Valera ay mabilis na inareglo umano ang pamilya ng biktima ng halagang P100,000. Tila sa takot ng pamilya ay bigla na lamang tumahimik na posibleng nagpaareglo sa pulis na si Valera.
Marahil malaking takot dahil pulis ang suspek, kaya minabuti nang magpaareglo ng pamilya.
Ang asal ng pulis na si Valera, kung itinuloy ng pamilya na sampahan ng kaso, ay magiging aral sa kanyang paglabag sa sinumpaang tungkulin.
Puwede pa sana siyang masibak sa kanyang tungkulin.
Kaya maraming abusadong pulis dahil naareglo ang kaso, sana ‘di na ito maulit pa sa pamilyang nagpaareglo!
Dapat ay sampahan ng kasong administratibo ang pulis na si Valera ng kanyang superior officers dahil ang tulad ni Valera na berdugo ay hindi bagay na maging pulis.
Imbes magbigay ng proteksiyon, sila pa ang promotor ng kaguluhan!
SPDC director C/Supt. Ely Cruz, alisin mo sa lungsod ng Parañaque Police si Valera dahil magsisilbing anay ‘yan sa iyong administrasyon!
ISUMBONG MO
KAY DRAGON LADY
ni Amor Virata
