NBI pasok vs hackers ng Comelec website

NAISUMITE na sa National Bureau of Investigation (NBI) ang report ng Commission on Elections (Comelec) hinggil sa nangyaring pag-hack sa kanilang official website nitong nakaraang weekend.

Ayon kay Comelec Spokesman James Jimenez, ipauubaya na nila ang kaso sa NBI Anti-Cybercrime Division para sa matukoy ang mga nasa likod ng insidente.

Para kay Jimenez, hindi lang ang parusa sa mga may kagagawan ng hacking ang concern nila ngayon kundi maging ang posibilidad na may ‘malware’ pang naiwan sa web page nila kahit naisa-ayos na ito ng kanilang web developer.

Naniniwala si Jimenez na ang ang pagkakapasok sa kanilang public web portal ay hindi nangangahulugan na kaya na ring sirain ng hackers ang gagamiting server sa darating na araw ng halalan.