Totoy tigok sa stray bullet

NAMATAY ang isang binatilyo makaraang tamaan ng ligaw na bala habang idinaraos ang kapistahan sa kanilang lugar sa Brgy. Minuyan 1, San Jose del Monte City, Bulacan kamakalawa.

Sa ulat mula kay Supt. Charlie Cabradilla, hepe ng SJDM City Police, ang biktima ay kinilalang si Polo Araneta, 11-anyos, grade school pupil, at residente sa nabanggit na barangay.

Lumitaw sa imbestigasyon, ang biktima ay sumasayaw at nakikipagsayahan kasama ang ilang kaibigan at habang nasa kasagsagan ng pagpapaputok ng kuwitis para sa kapistahan ay bigla na lamang bumulagta.

Nabatid na habang may sumasabog na kuwitis ay may sumabay na nagpaputok ng baril sa lugar at tinamaan ng ligaw na bala sa ulo ang biktima.

Mabilis na isinugod sa pagamutan ang biktima ngunit idineklarang dead on arrival sanhi nang malubhang tama ng bala sa ulo.

Nagsasagawa na nang malalimang imbestigasyon ang pulisya upang matunton ang pinagmulan ng ligaw na bala at mapanagot ang suspek sa insidente.

Micka Bautista)