Dagok kina Ping at Mar ang “Yolanda”

SA DARATING na pambansang eleksiyon, tiyak na may malaking epekto sa boto ng mga politikong sina LP presidential bet Mar Roxas at senatorial candidate Ping Lacson, kung paano nila ginampanan ang kanilang papel sa nangyari sa mga biktima ng bagyong Yolanda.

Hindi maitatanggi nina Roxas at Lacson na malaki ang kanilang pagkukulang sa mga sinalanta ng bagyong Yolanda sa Kabisayaan kung kaya’t hanggang ngayon ay nagpupuyos pa rin sa galit ang mga biktima dahil sa ginawa sa kanila ng dalawang politiko. Sino ang makalilimot sa ginawa ni Roxas nang pagsabihan niya ang mga taga-Tacloban na “bahala kayo sa buhay n’yo!”  At sino rin ang makalilimot sa ginawang pagtataray ni Lacson sa mga biktima ng bagyong Yolanda kaya nga siya idineklarang persona non-grata sa Eastern Visayas ng grupong People Surge.

Tama talaga ang kasabihang “lintek lang ang walang ganti” at ganyan ang mangyayari sa araw ng eleksiyon dahil hindi iboboto ng mga Waray sina Lacson at Roxas.  At ano ba kasi ang maaasahan mo sa tulad ni Roxas na anak mayaman, ilustrado at tunay na panginoong may lupa? At si Lacson naman, ano nga ba rin ang maaasahan sa taong ito na wala na yatang ginawa kundi ang magtaray at makipag-away. Parang babae, ayaw tumigil sa kapuputak?