Dalagita nabuntis, lolo tinutugis

BACOLOD CITY – Pitong buwan nang buntis ang isang dalagita makaraang gahasain ng kanyang lolo sa Negros Occidental.

Ito ang lumabas sa resulta ng pagsusuri sa biktima makaraang mabunyag ang panghahalay sa kanya ng suspek na ngayon ay tinutugis ng mga awtoridad.

Nabunyag ang panghahalay ng lolo sa kanyang apo nang mahalata ng mga kaklase ng biktima ang paglaki ng tiyan ng dalagita.

Hindi na rin ito naitago sa mga mata ng kanyang mga guro at sa tulong ng mga opisyal ng barangay at barangay health workers ay ipinasuri ang biktima at nakompirmang siya ay buntis.

Bunsod nito, ibinunyag ng biktima na noong Marso, siya ay ilang araw na ginahasa ng kanyang lolo habang silang dalawa lamang ang nasa kanilang bahay.

Aniya, tinatakot siya ng kanyang lolo na palalayasin sa bahay kung hindi susunod sa kanyang gustong mangyari.

Napag-alaman, sumakabilang-buhay na ang ina ng biktima, at siya at ang kapatid na 13-anyos babae ay iniwan na ng kanilang ama.