Ambush sa Marawi police chief work related

CAGAYAN DE ORO CITY- Kaugnayan sa trabaho ang anggulong tinutukan ng pulisya kung bakit tinambangan ang chief of police ng hindi kilalang mga salarin sa Brgy. Luksa Datu, Marawi City kamakalawa.

Ito ang inihayag ni Lanao del Sur provincial police director, Senior Supt. Seigfred Ramos kaugnay sa sinapit ni Marawi City Police Station Director Al Wahab Santos.

Sinabi ni Ramos, ilang beses nang nakatanggap ng mga banta sa buhay si Santos dahil sa walang humpay na anti-criminal operation campaign kaya marami ang nagtanim ng galit sa kanya.

Aniya, iminungkahi niya kay Santos na magkaroon ng personal security escort sa kanyang mga lakad dahil sa panganib ng kanilang trabaho.

Kaugnay nito, pansamantalang hahalili sa iniwang puwesto ni Santos ang deputy provincial police director ni Ramos.

Napag-alaman, nanggaling sa isang command conference si Santos at nang pauwi na ay pinaulanan ng bala mula sa nakasakay sa isang pribadong sasakyan.