HATAW! D'yaryo ng Bayan hatawtabloid.com
ni GERRY BALDO
HIHILINGIN ng mga prosecutor ng Kamara sa Senate impeachment trial ni Vice President Sara Z. Duterte ang pahintulot ng impeachment court upang mabuksan ang mga bank records ng bise presidente at ng kanyang asawang si abogado Manases Carpio, gayundin ang mga income tax records na isinumite ng Bureau of Internal Revenue (BIR).
“Ayaw na muna naming talakayin nang mas detalyado ang mga partikular na impormasyon dahil nasa proseso na tayo ng impeachment trial. Ngunit may mga karagdagang ebidensiya na hindi ganap na nailahad noong mga pagdinig ng House Committee on Justice na hihilingin naming maipresinta sa Senate impeachment court,” ayon kay Bicol Saro Party-list Rep. Terry Ridon sa isang press conference ng prosecution team noong Martes.
Ayon kay Ridon, kabilang dito ang planong pagbubukas ng mga dokumento ng BIR na dating isinumite sa Justice committee, pati na rin ang pagbubukas ng mga bank records ng mag-asawang Duterte-Carpio.
“Kasama po riyan ang unsealing of the BIR box. Kasama rin po rito ang pagbubukas ng bank records ng mag-asawang Duterte-Carpio, subject of course to the authority and processes of the Senate impeachment court,” ani Ridon.
Aniya, kabilang sa House prosecution panel, handa ang mga prosecutor na iharap ang kanilang kaso sa Senado at hayaang masuri ang mga ebidensiya sa paglilitis.
“On unexplained wealth, nakita naman po natin ang body of evidence during the Committee on Justice proceedings. We believe the evidence on record, together with additional evidence that may be allowed by the impeachment court, will be central to the prosecution’s case,” dagdag niya.
Sa mga pagdinig ng Justice committee, nagpresinta ang Anti-Money Laundering Council (AMLC) ng ulat na nagsasabing may kabuuang ₱6.77 bilyong covered at suspicious financial transactions na kinasasangkutan ng Bise Presidente at ng kanyang asawa sa loob ng 20 taon.
Sa naturang halaga, umabot sa ₱4.4 bilyon ang inflows habang ₱1.5 bilyon naman ang outflows, kung saan napansin ng mga miyembro ng komite ang tinatayang net inflow na nasa ₱2.8 bilyon.
Nagpahayag ng pangamba ang mga miyembro ng komite dahil hindi umano naipakita ang mga naturang transaksiyong pinansyal sa Statements of Assets, Liabilities and Net worth (SALN) ng Bise Presidente.
Ang mga SALN ng mag-asawa — mula noong panahon ni Duterte bilang vice mayor ng Davao City hanggang 2024 — ay isinumite ng Office of the Ombudsman. Makikita rito na tumaas ang kanilang idineklarang net worth mula ₱7 milyon noong siya ay vice mayor hanggang ₱88.5 milyon pagsapit ng 2024.
Isinumite rin ng BIR ang income tax returns ng mag-asawa ngunit nagpahayag ito ng pangamba sa posibleng paglabag sa Tax Code kung susuriin ang mga dokumento sa bukas na pagdinig. Dahil dito, pinili ng Justice committee na manatiling selyado ang mga tax documents.
Kalaunan ay ipinadala sa Senado ang selyadong BIR box kasama ng Articles of Impeachment.
Sinabi ni Senior Deputy Majority Leader at Iloilo Rep. Lorenz Defensor, isa rin sa mga miyembro ng prosecution team, na handa silang magpresinta ng mga ebidensiya at testigo sa impeachment court.
“We are confident with the evidence that we have. The evidence will speak for itself once presented before the Senate impeachment court,” ani Defensor.
“We have witnesses to present. We will present our case fully, properly, and in accordance with the rules of the impeachment court,” dagdag pa niya.
