HATAW! D'yaryo ng Bayan hatawtabloid.com
SANGKATUTAK na negatibong komento sa social media ang naka-post mula sa iba’t ibang grupo at mga residente ng City of San Jose del Monte, Bulacan kaugnay ng ipinatatayong landmark na may inisyal na pangalan ni Mayor Arthur Robes na ‘di hamak na mas malaki pa sa SJDM at maging sa mga pader na ginawang bakod.
Nangangalap ngayon ng signatory campaign ang isang grupo laban kay Mayor Robes na sinasabing ‘ilegal’ ang nasabing proyekto ng kasalukuyang alkalde.
Mayroong nagkomento sa social media din na ang nasabing proyekto umano ay bahagi ng pagkilala sa SJDM bilang ‘rising city’ na agad kinontra ng netizens at nagsabi na huwag gawing tanga ang mga taga-SJDM! Dahil ang “I LOVE (na hugis puso) AR” ay pagpapatunay lang na ‘conflict of interest’ ng administrasyong Robes, at isang maagang pangangampanya sa malayo pang araw ng eleksiyon.
Nasaktan umano ang mga taga-SJDM dahil imbes “I LOVE SJDM” ay I LOVE AR ang nakikita na pagpapatunay umano na mistulang ‘pag-aari’ na ng alkalde ang kaban ng bayan ng SJDM mula sa taxpayer ng siyudad ng SJDM, Bulacan.
Sa kasalukuyan ay umiikot umano ang signature campaign vs Robes at inaabangan pa natin ang kasong isasampa laban sa naturang Mayor.
Sana matuloy ang petisyon…
KAWAWANG MGA NEGOSYANTE
First quarter ng taon, bayad sa mga business permits, real property tax, at sa Bureau of Internal Revenue… ‘yan ang sakit ng ulo ng mga negosyante dahil hanggang ngayon ay ‘di pa tapos ang pandemic at lalong lumolobo ang CoVid virus at UK variant sa bansa. Paano ang mga negosyante? Kapag nagsara ang mga negosyo, paano na ang ekonomiya ng bansa?
Higit na kawawa ang mga lokal na pamahalaang umaasa sa pagbabayad ng buwis ng mga negosyante? Paano matutugunan ang mga proyekto ng mga namumuno?
Gaya ngayon, nagpalabas ng kautusan ang Palasyo na balik skeletal force ang lahat ng nasa ilalim ng gobyerno, paano ang mga empleyado na nasa ilalim ng job order? At ‘yung mga regular employees naman at patuloy na sasahod ng a-kinse at katapusan ng bilang lang ang araw ng pasok? Ang suweldo nila ay buhat sa mga taxpayers, paano kung wala nang magbayad?
Grabe na ang dinaranas ng sanlibutan, mabuti at may vaccines nang dumating. Paano naman tayo nakatitiyak na totoong ligtas na tayo kung may vaccines na?
Dasal… Dasal ang pinakamahusay na armas sa ngayon.
Isumbong mo
kay DRAGON LADY
ni Amor Virata
