PNP sa SJDM Bulacan bulag sa ilegal na droga

MUKHANG balewala sa mga tauhan ng Philippine National Police ng City of San Jose del Monte sa Bulacan ang administrasyon ng Pangulong Rodrigo Duterte dahil hanggang ngayon ay patuloy ang paglaganap ng ilegal na droga, partikular sa lugar ng Gumaoc.

***

Hindi lamang bulag, bingi sa bilihan ng droga, at harapan na kung magbenta. Hindi alintana ng mga pusher at drug user. Ito ay kapabayaan ng mga tauhan ng PNP sa nasabing lugar.

***

Hindi ba ito nakikita ni Mayor Robes? Wala ba siyang natatanggap na reklamo mula sa mga residente ng Gumaoc? O sadyang bulag din si Mayor? Mistulang senadora Leila de Lima, kaya bulag pati si Mayor? Iisa lang ang alam kong dahilan kapag hindi inaaksiyonan ang isang ilegal na gawain, may PARATING! Tama ba o mali Mayor?

NAWALA ANG TIRTIR SA PASAY

DATI-RATI  ay nagkalat ang mga dayuhang miyembro ng tirtir o mga snatcher, mandurukot sa Rotonda, Pasay City. Ngayon, wala nang laman ang police blotter ng Criminal Investigation Unit ng Lungsod ng Pasay, kompara sa dating administrasyon na napupuno ang police blotter ng pulisya sa araw-araw na reklamo sa masasamang elemento, partikular ang mga kasong snatching at pandurukot sa nasabing lugar!

***

Noon kapag may nadadakip na snatcher, taga-Tondo o kaya Cavite, kadalasan ay pawang dayo lamang sa lungsod ng Pasay. Ang hindi lamang nabago sa Rotonda, Pasay City ay nakabalagbag na mga pampasaherong jeep, na dalawang linya ang sakop sa gilid ng Metro Mall, Taft Ave. Pasay City. Nakatanga lamang ang mga pulis, at tipong legal na legal ang ginawang terminal na jeep, apektado ang mga pribadong sasakyan na dumaraan…may naamoy ako… MAGKANO!

ISUMBONG MO KAY DRAGON LADY – Amor Virata