Pan-Buhay: Kamatayan

“At namangha ang mga tao sa nakita nilang kapangyarihan ng Diyos. Hangang-hanga ang lahat ng mga tao sa ginawa ni Jesus, ngunit sinabi niya sa kanyang mga alagad, “Pakinggan ninyo at tandaan itong sasabihin ko: ang Anak ng Tao ay pagtataksilan at mapapasailalim sa kapangyarihan ng mga tao.” Ngunit hindi nila ito naunawaan sapagkat inilihim sa kanila ang kahulugan nito. Nag-aalangan naman silang magtanong kung anong ibig niyang sabihin.” Lucas 9:43-45

Matapos magpalayas ng demonyong sumapi sa isang bata, pinaalalahanan ni Jesus ang kanyang mga alagad tungkol sa nalalapit niyang kamatayan. Bagamat hindi siya naunawaan, minabuti ng mga alagad na manahimik na lamang. Marahil, katulad din natin, ayaw nating isipin o pagusapan ang tungkol sa kamatayan.

Ayaw man nating isipin ang ating kamatayan, hindi natin maitatanggi ang katotohanang lahat tayo ay mamamatay. Una-una nga lamang at hindi natin alam kung kailan. Dahil dito, makabubuting lagi tayong nakahanda. Para sa mga naniniwala sa buhay na walang hanggan, mahalaga na makamit natin ito pagdating ng ating oras.

Paano nga ba tayo magiging handa? Tandaan natin na, nang tayo ay isinilang, wala tayong dala-dala. Ganyan din ang mangyayari sa atin kapag tayo ay sumakabilang-buhay na. Kaya makabubuting palayain natin ang ating mga sarili sa pagkaka-alipin sa mga bagay-bagay sa mundo na nahihirapan tayong pakawalan. Kayamanan, mga ari-arian, kapangyarihan, katanyagan – ang mga ito ay karaniwan nating sinasandalan at magkaminsa’y dinidiyos sa ating buhay. Walang saysay ang lahat ng iyan sa harap ng paghuhukom sa atin ng Panginoon.

Ang pagkakaroon ng isang maayos at tamang pamumuhay ay magandang paghahanda para sa kamatayan. “Ibigin mo ang Panginoon mong Diyos nang buong puso, nang buong kaluluwa, at nang buong pag-iisip. Ibigin mo ang iyong kapwa gaya ng pag-ibig mo sa iyong sarili.” Mateo 22:37. Kapag ito ang ating susundin, di na tayo dapat matakot sa kamatayan. Bagkus, titingnan natin itong isang daan tungo sa buhay na walang hanngan.

(Ang PAN-BUHAY ay isang pakikipag-ugnayan sa pamamagitan ng panulat tungkol sa ating buhay espirituwal at sa ating Panginoon na tinatawag din nating “Ang Tinapay (Pan) na Nagbibigay-Buhay”)

ni Divina Lumina