4 Pinoy dinukot sa oil field sa Libya

APAT na Filipino ang kabilang sa mga dinukot ng armadong grupo makaraan atakehin ang oil field sa Libya.

Ito ang kinompirma kahapon ni Department of Foreign Affairs spokesman Charles Jose.

Ayon kay Jose, dinukot ang naturang Filipino workers kasama ang limang iba pa noong Marso 6.

Sa ngayon ayon kay Jose, wala pang umaako ng responsibilidad sa pagdukot sa mga biktima.

Hindi pa rin aniya nakatanggap ng ransom demand ang kanilang employer.

Pitong Filipino na ang dinukot ng militanteng grupo sa Libya.

Nitong nakaraang buwan ay tatlong Filipino ang dinukot sa Mabruk Oil Field at hindi pa natutukoy kung saan sila dinala.