Action-serye nina Daniel, Richard makikipagsabayan kay Coco

HATAWAN
ni Ed de Leon

MABUTI naman at matapos ang dalawang taon ay muling magkakaroon ng isang serye sa telebisyon si Daniel Padilla. Wala ang kanyang malakas na partner na si Kathryn Bernardo pero isa iyong action series na kasama si Richard Gutierrez na walang dudang nakapagdadala rin ng sarili niyang serye at kilala na sa action series. Tama rin naman ang dating ng project na iyan dahil sa edad ni Daniel sa ngayon, parang wala na sa ayos iyong lover boy ang kanyang role. Kailangan na niyang mag-shift ng takbo ng career at saan nga ba sumikat ang lahat ng Padilla kundi sa action.

Pero dapat maihanda pa rin nila ang mga tao sa shift na iyan sa image ni Daniel na gagawin nilang isang action star sa seryeng iyan. Alam naman ninyo ang fans, hahanapin pa rin nila iyong cute at guwapo si Daniel sa kanyang ayos na hindi naman magagawa kung action star na nga siya.

Isa pa paano maba-balance ang roles nila ni Richard? Natural lang naman sa kampo ni Richard na igiit ang kanyang seniority, pero maari ba namang basta maiwan si Daniel na napatunayan na rin namang isang malaking star on his own?

Isa pa, tiyak na makababangga rin nila ang Batang Quiapo kahit na sabihing iba ang kanilang oras at nasa iisang network din sila. Dahil pareho silang action, at malanmang sa hindi ay magkasunod ang serye nila, magkakaroon tiyak ng comparison. Pero halata namang inilayo nga nila ang istorya dahil kung ang serye nina Daniel at Richard ay parang high action, aksiyong kalye naman ang Batang Quiapopero kahit na, tiyak na may comparison pa rin iyan.

Sa labanan kayang iyan, sino ang mamamayani, sina Richard at Daniel o si Coco Martin pa rin? May partida na nga, magkasama ang following nilang dalawa ni Richard, samantalang nag-iisa lang si Coco, pero matatalo ba nila ang huli?

Pero alam naman inyo ang laban sa telebisyon, parang basketball din iyan at may kasabihan bilog ang bola.