HATAW! D'yaryo ng Bayan hatawtabloid.com
HATAWAN
ni Ed de Leon
MAGANDA ang pananaw ng Hastag member at ngayon ay isang actor na ring si Wilbert Ross. Oo gumagawa siya ng sexy movies, gaya ng pelikula niya ngayong High on Sex, pero ang mga pelikulang iyon ay comedy pa rin, hindi talagang iyon ang ibinebenta ay kahalayan. Hindi rin dapat na asahan si Wilbert na maghubad sa pelikula, o gaya ng iba na nagbubuyangyang na ng kanilang private parts. May career naman kasi si Wilbert, composer din siya at ngayon ay kumakanta pa.
Hindi naman siya masyadong ambisyoso na kagaya ng ibang mga hambog na ang balak agad ay makarating ng Hollywood. Suntok naman sa buwan iyon. Pero makikita mo na may ambisyon iyong bata.
Ngayon napakaraming baguhan na naisama lamang sa bit role sa mga gay indie at gay series, ang akala nila ay artista na sila. Akala nila sikat na sila. Iyan ang mga taong pagkatapos ay walang nadarama kundi kabiguan, at pagkatapos ang sisisihin sa katangahan nila ay ang kalakaran sa showbiz.
Sa showbusiness kung hindi ka tanga, at mapagpaniwala sa mga nambobola lamang na wala pa namang pruweba ang trabaho, hindi ka mapapahamak.
