Thursday , April 18 2024
PROMDI ni Fernan AngelesI
PROMDI ni Fernan Angeles

Bakuna, hindi selda

PROMDI
ni Fernan Angeles

HINDI na bago sa mata ng masa ang pagiging brusko ng Pangulo. Katunayan, ‘di nga ikinagulat ng madla ang inilabas niyang direktibang pagdakip ng mga taong hindi pa bakunado kontra CoVid-19 sa mahigit 42,000 barangay units sa buong bansa.

Ang siste, mistulang kriminal ang turing ng Pangulo sa mga ‘di pa bakunado. Kasi naman ang atas niya’y hanapin at dakpin ang mga susuway sa kanyang direktibang walang sinasandigang batas man lamang. Walang batas ang nagtatakda ng mandatory vaccination. ‘Yan ang klaro.

Totoong kailangan natin ang proteksiyon laban sa nakamamatay na sakit na dala ng mga kaibigan niyang tsekwa. Pero sa totoo lang, hindi kailanman lunas ang selda sa bantang peligro ng pandemya.

Sa halip na dakpin, bakit kaya hindi na lang ibahay-bahay ang pagbabakuna? ‘Yan na marahil ang pinakamabisang paraan para mahagip ang asam na proteksiyong kalakip ng mga bakunang ginastusan nang husto ng pamahalaan.

Kung tutuusin, ang pagdedeklara ng alert level 3 sa malaking bahagi ng bansa ang pinakamagandang pagkakataon para magbahay-bahay.

Kung kaya nilang susugin ang kasuluk-sulukan ng mga liblib na komunidad sa tuwing sila’y nanlilimos ng boto, bakit hindi nila gawin ngayon? Isipin na lang nilang praktis sa nalalapit na pag-iikot para mangampanya.

May mga kaibigan rin naman ako sa barangay at PNP, at kung pagbabatayan ang palitan namin ng kuro-kuro, napagtanto kong maging sila’y bantulot sa direktiba ng Pangulo.

Bakit nga naman hindi? Ilalagay na naman sila sa alanganin, pararatangan ng pagiging abusado o di naman kaya’y sampahan ng asunto.

O di naman kaya, puwersahin ang Kongreso para bumalangkas at magpasa ng batas para sa mandatory vaccination? Bagamat abala na marahil ang mga mambabatas sa kani-kanilang pamumulitika, puwede naman sigurong obligahin ng Pangulo ang Kongresong pinamamahayan ng kanyang mga tuta’t kaalyado.

Kasabay nito, dapat din tugunan ng pamahalaan ang suliraning kinakaharap ng healthcare services ng bansa. Kulang na ang mga pasilidad, kapos pa ang mga healthcare workers na kakalinga sa mga patuloy na pagdami ng mga pasyente.

Ang masaklap, hindi na sapat ang mga pampublikong ospital.

Bakit kamo? Marami na sa hanay ng mga may-ari at nangangasiwa ng mga pribadong pagamutan ang nagdadalawang isip tumanggap ng pasyenteng miyembro ng PhilHealth. Kasi naman, hanggang ngayon ‘di pa nga naman sila binabayaran ng PhilHealth.

Ang kawawa, yaong mga ordinaryong manggagawang puwersahang kinakaltasan ng buwanang kontribusyong hindi rin naman pala nila magagamit para isalba ang sarili at pamilya sa panahong higit na kailangan.

Bukas ang PROMDI para sa mga reklamo, sumbong o pagtutuwid, maaaring makipag-ugnayan sa [email protected].

About Fernan Angeles

Check Also

FIRING LINE ni Robert B. Roque, Jr.

Sinong gustong dumaan sa EDSA Carousel?

FIRING LINEni Robert B. Roque, Jr. PARA sa mga nagdududa sa ‘kasagradohan’ ng EDSA Carousel …

Sipat Mat Vicencio

Mayor Abby Binay pasok sa ‘Magic 12’ ng Pulse Asia, hahaha…

SIPATni Mat Vicencio SINO ba naman ang maniniwala sa ginawang survey ng Pulse Asia kamakailan …

Dragon Lady Amor Virata

Ikot-ikot na para sa 2025 local elections

Isumbong mokay DRAGON LADYni Amor Virata IBA’T IBANG pakulo o propaganda na ang sinisimulan ng …

AKSYON AGAD ni Almar Danguilan

QCPD nakapagtala ng 82.61% Crime Solution Efficiency sa nagdaang Semana Santa

AKSYON AGADni Almar Danguilan SADYANG hindi maiwasan na saluduhan ang Philippine National Police (PNP) sa …

YANIG ni Bong Ramos

Riders at tricycle drivers, ‘suki’ ng traffic enforcers

YANIGni Bong Ramos KAHABAG-HABAG ang kalagayan ng riders at tricycle drivers dahil sila ay suking …